Perioral dermatit

Ağız ətrafındakı qızartı və xırda səpgi çox vaxt sadəcə "dəri problemi" kimi qəbul edilir. Halbuki bu, perioral dermatit ola bilər. Səpgi ağız ətrafında, bəzən burun qanadları və göz ətrafında yaranır, dodaq kənarında isə nazik təmiz zolaq qalır.

Nə səbəb ola bilər

• Hormonlu kremlərin uzun müddət özbaşına istifadəsi
• Ağır, yağlı kremlər və çox sayda kosmetik vasitə
• Flüorlu diş pastaları
• Hormonal dəyişikliklər və dəri baryerinin zəifləməsi

Müalicə

Müalicə hər pasiyent üçün fərdi qurulur və səbr tələb edir. Çox vaxt ilk addım qulluğu sadələşdirməkdir: bir çox vasitədən imtina edib yalnız ən lazımlıları saxlayırıq. Bundan sonra yerli və ya daxilə qəbul olunan müalicə təyin edirəm. Hormonlu kremi birdən dayandırmaq səpgini müvəqqəti artıra bilər, ona görə bunu həkim nəzarəti ilə etmək lazımdır.